广西佬童谣

闪电 · 发表于 2014-9-4 23:52:25

本帖最后由闪电于 2014-9-4 23:57 编辑

广西佬童谣
1、二叔公，吹火筒，买碌蔗，又生虫，买只饼，又穿窿，买只糍粑呢喉咙，揾个老婆耳又聋。
2、凼凼转，菊花园，阿嫲孭我去睇龙船，龙船母好睇，返嚟睇鸡仔，鸡仔大,捉去卖，卖得几多钱，卖得三百钱，金腰带，银腰带，请你公公婆婆出嚟拜，拜得多畀嘀我，拜得少，留畀你两公婆。
3、波波车，嫁姑爷，几时嫁?琴晚夜，嫁边个?嫁麻蹩。麻蹩多作怪，害死全世界。
4、河边有只羊，河边有只象，河边有只马骝精生得鬼咁样，蒸冬糕，蒸冬糕，蒸出发菜糕。
5、落雨咪咪，水浸田基，田基有戏唱，阿婆落蚊帐，蚊帐有木虱，嗫着阿婆只大屎窟。
6、咸鱼头。咸鱼尾，边个大吃就系你，摞条绳仔绑着你，再摞蠧牛屎屯死你。
7、老豆当三叔，三叔当木碌。牛耕田，马食谷，老豆揾钱仔享福。
8、月光光，月白白，老鼠偷萝卜，盲佬装见，哑巴喊捉贼。
9、独吃独生疮，打死冇人帮。
10、肥婆肥冬瓜，生仔生轮打，一打十二只，只只都有尾巴，阿婆番嚟笑哈哈，阿公番嚟丢那妈。
11、点虫虫，虫虫飞，飞过隔离寻婆嘀，婆嘀有荔枝，摞比仔仔吃一滴。
12、行……行，行到街边执只橙，橙好食，路好行。
13、麻雀仔，尾弯弯，做人新抱实艰难，早早起身都话晏，又挨家婆打一餐，打断三条苏木棍，打开罗裙血淋淋。
14、工人叔叔打米育，农民伯伯打赤肋。
15、屙屎毋出赖地硬，屙尿毋出赖风大。
16、大眼妹，真系衰，屙屎屙尿挨蚊锥
17、禽罗大屎窟，吃得毋做得。
18、老嘿壳，卖豆角，一日卖得三四角。
19、风湿痛，腰骨又痛，耐耐又痛嘀嘀，耐耐又痛嘀嘀。
20、头尖额窄，周身贱格，毋系扛棺材就系执垃圾。
21、从前有座山，山里有座庙，庙里有两个和尚讲故事，讲咩故事呢？讲从前有座山，山里有座庙……。
22、蚂蚁多多，蚂蚁惰惰，出来扛猪仔哦。
23、老嘿壳，卖豆角，屙尿嘟嘟淋豆角。
24、光头爷爷坐火车，坐到南宁屙督Ｋ。
25、切列婆，卖菠萝，卖畀地主做老婆，地主毋要佢，一脚把佢兜落河。
26、麻蹩爱食介菜粥，猪乸爱食麻蹩肉。
27、春天到，夏天到，稍牙行到西瓜铺，食晒西瓜毋算数。人怕鬼，鬼怕人，西瓜最怕稍牙人。
28、肥婆肥婆跌落河，执番上来晕舵舵。
29、落雨大，水浸街，阿哥担柴上街卖，阿妹出街着花鞋。花鞋花袜花腰带，珍珠蝴蝶两边排，有钱打对玲珑鼓，冇钱打个石榴牌。
30、雪条，雪条，有屎有尿。
31、大笨象会跳舞，马骝中意散步。
32、人又老，钱又冇，老婆又走佬，二奶又大肚，三奶去勾佬。
33、拍大肶，唱山歌，人人话我无老婆，扚起心肝娶返个，有钱娶个娇娇女，冇钱娶个豆皮婆，豆皮婆，食得多，屙屎屙两箩，屙尿冲大海，屙屁打铜锣。
34、点脚乒乓，牛仔过牛坑，牛坑毋打鼓，白马毋行桥，车灵车灵定，车着阿嫲第一名。
35、打开蚊帐，打开蚊帐，有只蚊，有只蚊，快啲摞只拍嚟，快啲摞只拍嚟，拍晕佢，拍晕佢。
36、心惊惊，面青青，老师拉我去办公厅。
37、邋邋遢遢当警察，干干净净肺痨病。
38、肥仔义，卖豆豉，卖到年初二，执得一只大利是。
39、穿针筒，穿针筒，小小孩童买回去，留畀阿婆噤阿公。
40、阿威哥，耍陀螺，耍毋见赖老婆，老婆哭噎噎,老公扯何车（二胡）
41、我爱我嘅烂拖鞋，日夜都拖出街，三个华侨娄我卖，我都母戳卖。
42、落雨滠滠，穿对烂木屐，行到塘边，碰见只夹夹（田鸡）
43、买就嚟，买就嚟，毋买就鸡啼，鲤鱼糕，鲤鱼糕，食得肥努努。
44、小球藻，摞尿做，食哂肥努努。45、电灯着，鬼拉脚，拉着肥婆去打麻雀。
46、盲佬拍拖，盲佬拍拖，拉……错……人。
47、褦鸡疤，巴鸡翼，巴到南门揾屎食。南门有条金刚棍，打得褦鸡跳楞楞。
48、捉塘咩（蜻蜓）我孭你跌落塘。
49、街中间果个大肥婆，街中间果个大肥婆，佢定定拉住我，佢定定拉住我。
50、马嘟嘟，马特特，隔离阿婆做生日，毋识请我么？梳头等几日。
51、谈情说爱多风流啊，多风流。想到甩拖果阵时，茶饭都冇味。即使伤心，自己揾嚟笨戳，我又有飞天又有黄糖仲系稳戳阵，大……痴……嘿！
52、为食鬼，执蚂蚁，人地咁高你咁矮。
53、执得当买得, 有钱买冇得。
54、癞痄君，肚皮痕，人地食饭你咬痕（抓痒）。
55、光头椰子，上山屙白屎，挨我装见，罚佢两毫纸。
56、屙尿齐齐屙，母屙死大哥。
57、蹦牙齿，耙猪屎。
58、白衫打底，皮鞋响底，毋系衰仔就系契弟。
59、有钱冇起屋，有米冇食粥。
60、赖哭猫，偷钱买猪屌。
这么多的童谣，你知道几首？